काठमाडौँ, २५ साउन । राष्ट्रिय प्रजातन्त्र पार्टीले कप्तानगञ्ज र गोलबजारमा भएका पछिल्ला घटनाहरूप्रति चिन्ता व्यक्त गर्दै नागरिकको जिउधनको सुरक्षा गर्न नसक्नु राज्यको कमजोरी भएको बताएको छ ।
आज प्रतिनिधिसभाको बैठकमा राप्रपा सांसद सरस्वती लामाले धार्मिक वा अन्य जुनसुकै बहानामा हुने हिंसाले अन्ततः देशलाई नै क्षति पुर्याउने भन्दै यस्ता घटना पुनः दोहोरिन नदिन सरकारलाई सुरक्षा समन्वय र दीर्घकालीन उपाय अवलम्बन गर्न आग्रह गरेकी हुन् ।
उनले नेपालको बहुधार्मिक र बहुसांस्कृतिक पहिचानको रक्षा गर्दै सबै धर्म र आस्थाका केन्द्रहरूलाई व्यवस्थित बनाउनुपर्नेमा सांसद लामाले जोड दिइन् । उनले धार्मिक संस्थाहरूको व्यवस्थापनका लागि सबै धार्मिक संस्थाहरू अनिवार्य रूपमा सरकारी निकायमा दर्ता हुनुपर्ने, धार्मिक संस्थाहरूको आर्थिक स्रोत पारदर्शी हुनुपर्ने र नियमित लेखापरीक्षण गरिनुपर्ने र भविष्यमा द्वन्द्व न्यूनीकरणका लागि एउटा आस्थाको केन्द्रदेखि अर्को आस्थाको केन्द्रबिचको न्यूनतम दूरी र स्थानसम्बन्धी स्पष्ट मापदण्ड निर्धारण गरिनुपर्ने माग गरिन् ।
सांसद लामाले यो कुनै धर्ममाथिको हस्तक्षेप नभएर सुशासन, पारदर्शिता र सामाजिक सद्भावका लागि चालिनुपर्ने कदम भएको स्पष्ट पारिन् । राज्यले सर्वधर्म सम्भाव को सिद्धान्तमा आधारित भएर सबै धर्म, संस्कृति र धरोहरको संरक्षण गर्नुपर्ने लामाले बताइन् ।
उनले भनिन्, ‘हाम्रो विविधता विभाजनको कारण होइन, राष्ट्रिय एकताको शक्ति बन्नुपर्छ,’ ‘धर्मको नाममा हुने कानुन विपरीतका गतिविधिलाई कडाइका साथ रोक्दै सबैका लागि समान कानुनी मापदण्ड लागू गरियोस् ।’
