काठमाडौँ, २३ साउन । कलाकार दीपकराज गिरीले सामाजिक सञ्जालमा हुने असहिष्णु टिप्पणीप्रति आफ्नो असन्तुष्टि व्यक्त गरेका छन् ।
सरकारका काम(कारबाहीबारे आफ्ना धारणा राख्दा आउने प्रतिक्रियाले निष्पक्ष विचार व्यक्त गर्न गाह्रो भएको उनले औँल्याएका हुन्।
फेसबुकमा पोस्ट गर्दै गिरीले लेखेका छन्, ‘सरकारले गरेको गलत कामको विरोधमा लेख्नुस्, झोले ! सरकारले सुरुवात गरेको राम्रो कामको समर्थनमा लेख्नुस्, घन्टे !’
यस्तो प्रवृत्तिले गर्दा निष्पक्ष भएर आफ्ना विचारहरू लेख्न र अभिव्यक्ति स्वतन्त्रताको प्रयोग गर्न चुनौती थपिएको उनले बताएका छन्। मानिसहरूले जुनसुकै धारणालाई पनि कुनै न कुनै राजनीतिक कित्तासँग जोडेर हेर्ने गरेकाले कलम नै कलङ्कित हुने डर पैदा भएको गिरीको भनाइ छ।
