काठमाडौँ, १ असार । चलचित्र विकास बोर्डले प्रदर्शनको क्रममा रहेका नेपाली चलचित्रहरूको बक्सअफिस रिपोर्ट सार्वजनिक गरेको छ ।
बोर्डले आइतबारसम्मको बक्सअफिस रिपोर्ट सार्वजनिक गरेको हो । सार्वजनिक विवरणअनुसार चलचित्र ‘रोल नं १’ले आइतबारसम्म एक करोड ३५ लाख रुपैयाँ ग्रसकलेक्सन गरेको छ । यो चलचित्रलाई जोन योञ्जनले निर्देशन गरेका छन् ।
चलचित्रमा मुकुन भुसाल, सुशांक मैनाली, रेणु योगी, सिर्जना अधिकारी मुख्य भूमिकामा छन् । चलचित्रको बाल–कलाकारमा निर्भिक रेग्मी, रिन्चेन लामा, संयम कटुवाल र सिजल श्रेष्ठ रहेका छन् ।
विनोद पौडेल र जान्वी पौडेल निर्माता रहेको चलचित्रको सह–निर्मातामा छत्रमाया गिरी र रमेश चौलागाईं छन् । ‘रोल नं १’लाई महेश दवाडीले लेखेका हुन् ।
चलचित्र ‘कुम्भ’ले ३९ लाख रुपैयाँ ग्रसकलेक्सन गरेको छ । यो चलचित्रमा रन्धिर श्रेष्ठको लेखन तथा निर्देशन छ । चलचित्रमा अशोक आर्यन, सृष्टि खड्का, सुनिल थापा, रोहित रुम्बा, सुशील पोखरेललगायतको अभिनय छ ।
सबैभन्दा धेरै ‘लालीबजार’ले नेपाली बक्सअफिसमा नौ करोड १६ लाख रुपैयाँ ग्रसकलेक्सन गरेको छ । यो चलचित्रलाई यम थापाले निर्देशन गरेका छन् । स्वस्तिमा खड्का र रवीन्द्र सिंह बानिया यो चलचित्रको मुख्य भूमिकामा छन् ।
अनिल बुढा मगरले निर्देशन गरेको चलचित्र ‘मितज्यू’ले एक करोड ३२ लाख रुपैयाँ ग्रसकलेक्सन गरेको छ । सौगात मल्ल, दयाहाङ राई, तेरिया मगर यसको मुख्य भूमिकामा छन् ।
लक्ष्मण रिजालले निर्देशन गरेको चलचित्र ‘काजी’ले ४४ लाख ४८ हजार रुपैयाँ ग्रसकलेक्सन गरेको छ । विपीन कार्की र केकी अधिकारी यसको मुख्य भूमिकामा छन् ।
चलचित्र ‘लाइफ ड्यामेज’ले ३४ लाख ६६ हजार रुपैयाँ ग्रसकलेक्सन गरेको छ । यो चलचित्रको मुख्य भूमिकामा मिथिला शर्मा छिन् ।
