काठमाडौँ, २५ जेठ । हङकङले एसियन गेम्स पुरुष क्रिकेट छनोटको फाइनलमा नेपालसामु १८९ रनको लक्ष्य प्रस्तुत गरेको छ ।
सिंगापुर नेसनल क्रिकेट ग्राउन्डमा टस हारेर ब्याटिङको निम्तो पाएको हङकङले निर्धारित २० ओभरमा सात विकेट गुमाउँदै १८८ रनको योगफल तयार पार्यो ।
हङकङका अन्शुमन रथले सर्वाधिक ८० रनको इनिङ खेले । उनले ४५ बलमा ६ छक्का र ६ चौका प्रहार गरे । शाहिद वासिफले ५५ रन जोडे । उनले २८ बलमा सात चौका र तीन छक्का प्रहार गरे ।
शिव माथुरले २६ रन बनाए । पाँचौँ विकेटका लागि अन्शुमन र शिवले ८४ रनको साझेदारी गरेका थिए ।
नेपालका शेर मल्लले सर्वाधिक चार विकेट लिए । चार ओभर बलिङ गरेका उनले ३२ रन खर्चिए । करण केसीको नाममा दुई विकेट रहँदा सन्दीप लामिछानेले एक विकेट हात पारे ।
दुवै टोली अपराजित रहँदै च्याम्पियन बन्ने लक्ष्यमा छन् । नेपालले समूह चरणमा मलेसिया र चीनलाई हराएको थियो । सेमिफाइनलमा नेपालले ओमानलाई निराश बनायो ।
यता, हङकङले समूह चरणमा ओमान, बहराइन र सिंगापुरलाई हराएको थियो । सेमिफाइनलमा हङकङले मलेसियाको चुनौतीलाई पन्छाएको थियो ।
