काठमाडौँ, १६ जेठ । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सीता बादीले नेपालको संविधानले लैङ्गिक विभेदको अन्त्य गर्ने सङ्कल्पसहित महिलालाई लैङ्गिक भेदभाव बिना समान वंशीय हक, सुरक्षित मातृत्व र प्रजनन स्वास्थ्यसम्बन्धी हकका साथै राज्यका सबै निकायमा समानुपातिक समावेशी सिद्धान्तको आधारमा सहभागी हुने हकजस्ता मौलिक हकको प्रत्याभूति गरेको उल्लेख गरेकी छन् ।
नेपालको संविधानले महिला सहभागिताको सुनिश्चितता गरे अनुरूप स्थानीय तह, प्रदेश सभा, वर्तमान सङ्घीय संसद् र नेपाल सरकारको मन्त्रिपरिषद्मा समेत महिलाको सहभागिता हुनु उल्लेखनीय उपलब्धि रहेको मन्त्री बादीले बताएकी छन् ।
‘महिला अधिकारको सम्मान: आत्मनिर्भरता र समृद्धिको अभियान’ भन्ने मूल नाराका साथ आठौँ राष्ट्रिय महिला अधिकार दिवसको अवसरमा उनले नेपाली महिलाहरूको अधिकार स्थापित गर्ने सवालमा एउटा महत्त्वपूर्ण दिनको रूपमा स्मरण गरेकी हुन् । देश तथा विदेशमा रहेका सम्पूर्ण नेपाली दिदीबहिनी र महिला अधिकारको क्षेत्रमा कार्यरत व्यक्ति तथा सङ्घसंस्थाहरूमा हार्दिक शुभकामना व्यक्त गरेकी छन् ।
