धनगढी, १० जेठ । नेपाली कांग्रेसका नेता तथा पूर्वगृहमन्त्री रमेश लेखकले पार्टी एकताका लागि गिरिजाप्रसाद कोइराला र शेरबहादुर देउवाले जस्तै लचकता अपनाउन पार्टी सभापति गगन थापालाई सुझाव दिएका छन् ।
संस्थापनइतर पक्षले आइतबार धनगढीमा आयोजना गरेको सुदूरपश्चिम प्रदेशस्तरीय भेलामा बोल्दै लेखकले पार्टी सभापति थापालाई उक्त सुझाव दिएका हुन् । उनले निवर्तमान सभापति शेरबहादुर देउवाको योगदानलाई पनि पार्टीले ध्यान दिनुपर्ने बताए ।
लेखकले सभापति गगन थापासँग दुईवटा मात्र अपेक्षा रहेको बताए । बृहत्तर एकताका लागि हदैसम्म लचिलो हुनुपर्ने र देउवाले कांग्रेसलाई दिएको योगदान बिसर्न नहुने लेखकको भनाइ थियो । साथै, कांग्रेस एकताबद्ध भएर अघि बढ्नुको विकल्प नरहेको पनि भेलामा बताए ।
उनले भने, “हिजो कांग्रेस विभाजन भएर कांग्रेस (प्रजातान्त्रिक) भएका बेला गिरिजाप्रसाद कोइराला र शेरबहादुर देउवाले जसरी लचकता अपनाएर एकता गर्नुभएको थियो । अहिलेका सभापति र पदाधिकारीले पनि त्यसैगरी लचकता अनपनाउनुपर्छ । कांग्रेसमा बिग्रह भएका बेला राष्ट्रियता कमजोर र लोकतन्त्र अपहरित तथा समाप्त भएको इतिहासले देखाएको तथ्य हो, हामी एकताबद्ध र संगठित हुन जरूरी छ ।”
