काठमाडौँ, ८ जेठ । नेपालको तीनदिने भ्रमणमा रहेकी बेलायतकी इन्डो–प्यासिफिक तथा समानतामन्त्री सीमा मल्होत्राले परराष्ट्रमन्त्री शिशिर खनालसँग भेटवार्ता गरेकी छन् ।
आज सिंहदरबारस्थित परराष्ट्र मन्त्रालयका भएको भेटवार्तामा दुवै पक्षले नेपाल–बेलायत सम्बन्धका विभिन्न पक्षहरूमा छलफल गर्नुका साथै सम्बन्धलाई अझ सुदृढ पार्नुपर्ने आवश्यकतामा जोड दिएका थिए ।
भेटवार्तामा लगानी, व्यापार, शिक्षा, पर्यटन, जलवायु परिवर्तन र डिजिटल प्रविधिका क्षेत्रमा सहयोग अभिवृद्धि गर्ने विषयमा छलफल भएको थियो ।
भेटमा परराष्ट्रमन्त्री खनालले दशकौँदेखि समाधान नभएका पूर्व ब्रिटिश गोर्खाहरूको चिन्ता र गुनासोहरूलाई चाँडोभन्दा चाँडो सम्बोधन मन्त्री मल्होत्रालाई अनुरोध गरेका थिए ।
जवाफमा मन्त्री मल्होत्राले पूर्व ब्रिटिश गोर्खाहरूको समस्या समाधान गर्न बेलायत सरकार सकारात्मक रहेको जनाएकी थिइन् । नेपालमा भ्रमणका क्रममा बेलायती मन्त्री मल्होत्राले केही मन्त्रीहरूसँग भेटवार्ता गर्ने र लुम्बिनी र कपिलवस्तुको भ्रमण गर्ने कार्यक्रम छ ।
