काठमाडौँ, ६ जेठ । कृषि, वन तथा पर्यावरण मन्त्रालयले एक लाख ४४ हजार ८०३ मेट्रिक टन रासायनिक मल मौज्दात रहेको जनाएको छ ।
मन्त्रालयका कृषि विकास महाशाखा प्रमुख एवं सहसचिव डा. रामकृष्ण श्रेष्ठका अनुसार मौज्दात मल वितरण भइरहेकाले तत्कालका लागि मल अभाव नरहेको दाबी गरेका छन् ।
मध्यपूर्वको द्वन्द्वका कारण मल आउन ढिलाइ भएको बताउँदै उनले ‘स्ट्रेट अफ होर्मुज’ मा रहेको अवरोध खुल्ने बित्तिकै टेन्डर गरिएको चार लाख ९१ हजार मेट्रिक टन मल आउने विश्वास व्यक्त गरे । पछिल्लो द्वन्द्वका कारण विगत वर्षका तुलनामा मलको भाउ बढेको पनि कृषि मन्त्रालयले जनाएको छ । बिस्तारै रासायनिक मलको विकल्पमा जानुपर्ने र किसानलाई सकेसम्म प्राङ्गारिक मलको उपयोग गर्न पनि उनको आग्रह छ । नीति तथा कार्यक्रममा जैविक तथा प्राङ्गारिक मललाई प्राथमिकतामा राखिएको छ । जैविक तथा प्राङ्गारिक मलमा अनुदानको व्यवस्था नीति तथा कार्यक्रमले समेटेको छ ।
