एजेन्सी, ४ जेठ । उत्तर कोरियाली नेता किम जोङ उनले दक्षिण कोरियासँग जोडिएको सीमा क्षेत्रलाई थप सुदृढ बनाउँदै ‘अभेद्य किल्ला’ मा रूपान्तरण गर्न सेना नेतृत्वलाई निर्देशन दिएका छन् ।
युक्रेन युद्ध र मध्यपूर्वमा देखिएका आधुनिक युद्ध रणनीतिबाट प्रभावित उत्तर कोरियाले अब सीमाक्षेत्रको सुरक्षा संरचनालाई नयाँ ढङ्गले पुनर्गठन गर्ने सङ्केत दिएको विश्लेषकहरूले बताएका छन् ।
आइतबार आयोजित उच्चस्तरीय सैन्य बैठकमा किमले अग्रपङ्क्तिका सैनिक एकाइहरूलाई बलियो बनाउने तथा युद्ध रोकथामका लागि सैन्य तयारीमा ‘ठूलो परिवर्तन’ आवश्यक रहेको बताए । सरकारी समाचार संस्था कोरियन सेन्ट्रल न्युज एजेन्सी (केसीएनए) ले सार्वजनिक गरेका तस्बिरहरूमा किम पूर्ण सैनिक पोशाकमा उच्च सैन्य अधिकारीहरूको बैठकको अध्यक्षता गरिरहेको देखिएको छ ।
बैठकमा किमले कमान्डरहरूलाई ‘कट्टर शत्रु’ विरुद्धको दृष्टिकोण अझ कडा बनाउनुपर्ने बताएका थिए । यद्यपि समाचारमा कुनै देशको नाम उल्लेख नगरिए पनि यसलाई स्पष्ट रूपमा दक्षिण कोरियातर्फ लक्षित सन्देशका रूपमा हेरिएको छ ।
केसीएनएका अनुसार किमले ‘युद्धलाई अझ प्रभावकारी रूपमा रोक्न’ अग्रपङ्क्तिका एकाइहरू तथा सैन्य–प्राविधिक पक्षसँग सम्बन्धित अन्य प्रमुख संरचनाहरूलाई थप सशक्त बनाउने योजनालाई महत्त्वपूर्ण निर्णयका रूपमा प्रस्तुत गरेका थिए । उनले दक्षिणी सीमाक्षेत्रमा तैनाथ सैनिक संरचनालाई पुनर्गठन गर्दै सीमारेखालाई ‘अभेद्य किल्ला’ मा बदल्ने सत्तारूढ दलको नीतिबारे पनि चर्चा गरेकाे बताइएको छ ।
