काठमाडौँ, ३ जेठ । विश्वविख्यात आरोही कामी रिता शेर्पाले संसारको सर्वोच्च शिखर सगरमाथाको ३२औँपटक सफल आरोहण गरेका छन् ।
आज बिहान १०:१२ बजे उनी सगरमाथाको शिखरमा पुगेका पर्यटन विभागले जनाएको छ । योसँगै कामी रिताले धेरैपटक सगरमाथा चढेको यसअघिको आफ्नै विश्व कीर्तिमान भंग गरेका छन् ।
“सोलुखुम्बु, थामेमा सन् १९७० जनवरी १७ मा जन्मिएका कामी रिताले आफ्नो अदम्य साहस, अनुभव र समर्पणमार्फत पुनः विश्वसामु गर्वका साथ नेपालको शिर उठाउन योगदान दिएका छन्,” विभागबाट सगरमाथा आधार शिविरमा खटिएका उपसचिव खिमलाल गौतमले भनेका छन् ।
यस दिन नेपालको पर्वतारोहण इतिहासमा दुई कीर्तिमान कायम भएको उनले उल्लेख गरेका छन् ।
