काठमाडौँ, ३१ बैशाख । काठमाडौँबाट ९ लाख बढीको धनमाल चोरी भएको छ ।
काठमाडौँको तारकेश्वर नगरपालिका–८ लामबगर भेटघाट चोकमा डेरा गरी बस्ने राजकुमार खड्कासहित दुई जनाको कोठाबाट बुधबार दिउँसो सुनका गरगहना चोरी भएको हो । धादिङ घर भएका खड्काको कोठाबाट करिब ३ लाख ९२ हजार रुपैयाँ बराबरको धनमाल चोरी भएको प्रहरीले जनाएको छ ।
चोरीको अर्को घटना पनि तारकेश्वर नगरपालिका–८ मै भएको छ। नेपालटार डाडागाउँ बस्ने नुवाकोटकी ३९ वर्षीया निशा राईको कोठाबाट बुधबार बिहान सुनको गहना र नगद गरी करिब १ लाख ८१ हजार रुपैयाँ बराबरको धनमाल चोरी भएको छ । प्रहरीका अनुसार काठमाडौँका यी दुई स्थानबाट मात्रै करिब ५ लाख ७३ हजारको धनमाल चोरी भएको छ ।
सो घटनामा संलग्न फरार व्यक्तिहरूको खोजी कार्य तीव्र पारिएको र यस सम्बन्धमा आवश्यक अनुसन्धान भइरहेको प्रहरीले जनाएको छ ।
