काठमाडौँ, १९ बैशाख । नेपाली कांग्रेस संसदीय दलका नेता भीष्मराज आङ्देम्बेले सुकुमबासी बस्ती हटाउने क्रममा भइरहेको सरकारी कदमप्रति आपत्ति जनाएका छन् ।
शुक्रबार उनले सरकारमाथि आफ्नै नागरिकप्रति ‘निर्मम र दमनकारी’ व्यवहार गरेको आरोप लगाउँदै तत्काल रोक्न माग गरेका छन् । आङ्देम्बेले सुकुमबासी बस्तीमा डोजर चलाउने कार्यलाई केवल संरचना भत्काउने प्रक्रिया नभई राज्यको चरित्र उजागर गर्ने दृश्य भएको टिप्पणी गरेका छन् ।
उनले नेपाली कांग्रेस संसदीय दलको तर्फबाट उक्त कदमको घोर भर्त्सना गर्दै सरकारलाई तत्काल हस्तक्षेप रोक्न आग्रह गरेका छन् । वास्तविक सुकुमबासी नछुट्याई सबैलाई एकै रूपमा व्यवहार गर्दै उठिबास लगाउने कार्य अमानवीय र निन्दनीय रहेको उल्लेख गरे । उनले सेनासहितको सुरक्षा निकाय परिचालन गरेर गरिएका गतिविधिले राज्यलाई संरक्षक होइन, ’त्रासको प्रतीक’ बनाउने जोखिम बढाएको दाबी गरेका छन् ।
नेता आङ्देम्बेले मनोहरा बस्तीका एक किशोर र बल्खुस्थित बागमती किनारमा बस्ने एक वृद्धले आत्महत्या गरेको घटनाको उल्लेख गर्दै राज्यको नीतिगत व्यवहारले मानवीय सङ्कट गहिरिँदै गएको बताएका छन् । उनले मृतकका परिवारलाई राहत तथा क्षतिपूर्ति उपलब्ध गराउन र प्रभावितहरूको उचित व्यवस्थापन गर्न सरकारसँग माग गरेका छन् । त्यस्तै कीर्तिपुरस्थित होल्डिङ सेन्टरमा राखिएका सुत्केरी, असहाय तथा ज्येष्ठ नागरिकको मानवीय व्यवस्थापन गर्न र बिरामीलाई निःशुल्क उपचारको व्यवस्था गर्न पनि उनले सरकारको ध्यानाकर्षण गराएका छन् ।
उनले भनेका छन्, ‘जनताले दिएको जनमतको प्रतिफल यस्तै क्रूरतापूर्ण उठिबास हो भने त्यसप्रति हामी गम्भीर छौँ । यस्तो अमानवीय गतिविधि तत्काल रोक्न सरकारलाई आग्रह गर्दछौँ । अन्यथा यसको परिणाम गम्भीर हुनेछ । उनले प्रश्न गरेका छन्, ‘के राज्य आफ्नै नागरिकसँग युद्ध लड्दैछ ? यदि होइन भने सुकुमबासी व्यवस्थापनको नाममा किन यस्तो निर्दयी व्यवहार भइरहेको छ ?’
