एजेन्सी, १७ बैशाख । अमेरिकी राष्ट्रपति डोनाल्ड ट्रम्पले इरानलाई चाँडै चतुरता देखाउन (स्मार्ट हुन) र आणविक कार्यक्रमहरूमा कडा नियन्त्रणको माग पूरा गर्न चेतावनी दिएका छन् ।
अमेरिकी नौसैनिक नाकाबन्दीले इरानको अर्थतन्त्रलाई निकै कसिलो बनाउन थालेपछि ट्रम्पको यो चेतावनी आएको हो ।
अमेरिकी सञ्चारमाध्यमहरूका अनुसार, ट्रम्पले इरानको शान्ति प्रस्तावलाई खारेज गर्ने मनस्थिति बनाइसकेका छन् । इरानले आफ्नो पछिल्लो प्रस्तावमा होर्मुज जलमार्ग खोल्ने र इरानी बन्दरगाहहरूको नाकाबन्दी अन्त्य गर्ने प्रस्ताव राखेको थियो । यसका साथै आणविक कार्यक्रमबारे अर्को चरणको वार्तामा छलफल गर्ने प्रस्ताव पनि गरिएको थियो ।
अमेरिकी अखबार ‘वाल स्ट्रिट जर्नल’का अनुसार, ट्रम्प इरानले आफ्नो आणविक कार्यक्रम त्याग्न बाध्य नभएसम्म नाकाबन्दी जारी राख्न चाहन्छन् । ट्रम्पले सामाजिक सञ्जाल प्लेटफर्म ‘ट्रुथ’मा लेखेका छन्, “इरानले आफ्ना सबै कामहरू एकैसाथ गर्न सक्दैन ऊ चाँडै स्मार्ट हुनसके राम्रो हुनेछ ।”
इरान युद्ध सुरु भएदेखि नै इरानले तेल र ग्यास आपूर्तिका लागि महत्त्वपूर्ण मानिने ‘होर्मुज जलमार्ग’ बन्द गरिदिएको छ । यसका कारण विश्वभरको अर्थतन्त्रले ठूलो दबाब झेलिरहेको छ । बुधबार प्राप्त समाचार अनुसार, इरानको मुद्रा (रियाल) इतिहासकै न्यून स्तरमा पुगेको छ ।
तेहरानका एक बासिन्दाले समाचार एजेन्सी एएफपीसँग कुरा गर्दै भने, “हालका वर्षहरूमा जहिले पनि वार्ता भएको छ, आम मानिसका लागि आर्थिक स्थिति झन् खराब भएको छ । प्रतिबन्धहरू या त सुरु भएका छन् वा अझ बढी कडा पारिएका छन् । उनीहरू वार्ता गर्न जान्छन् र उताबाट थप प्रतिबन्धहरू लिएर फर्किन्छन् ।”
