एजेन्सी, १४ बैशाख । जापानमा ‘भेन्डिङ मेसिन’ बाट बिक्री हुने पेय पदार्थहरूको माग घट्दै गएको छ ।
जसले लामो समयदेखि चलिआएको भेन्डिङ मेसिन संस्कृतिमै असर पारेको छ । जापानमा भेन्डिङ मेसिनहरू हुलाक, पार्क, रेल स्टेसन, सडक किनार मात्र होइन, माउन्ट फुजीजस्ता दुर्गम स्थानहरूमा समेत पाइन्छन् । तर अहिले महँगीका कारण उपभोक्ताको क्रय क्षमतामै प्रभाव परेकाले यो व्यवसाय दबाबमा परेको छ ।
भेन्डिङ मेसिनमा सामान्यतया पेय पदार्थ, स्न्याक्स, चुरोट, खाना वा अन्य साना सामानहरू राखिएका हुन्छन् । पछिल्ला वर्षहरूमा जापानमा महँगी निकै बढेको छ, जसले पेय पदार्थ उद्योगमा समेत प्रत्यक्ष असर पारेको छ ।
इन्धन, ढुवानी, विद्युत् र मर्मत खर्च बढ्दा भेन्डिङ मेसिन सञ्चालन महँगो भएको छ । साथै, मेसिनहरूमा सामान भर्ने, मर्मत गर्ने र व्यवस्थापन गर्ने जनशक्तिको खर्च पनि बढेको छ । यी सबै कारणले कम्पनीहरूको नाफा पनि घट्दै गएको छ ।
नाफा घट्दै गएपछि ठूला कम्पनीहरूले भेन्डिङ मेसिनको प्रयोगलाई घटाउँदै लगेका छन् । केही कम्पनीहरूले हजारौं मेसिन हटाउने निर्णय गरिसकेका छन्, केहीले आफ्नो भेन्डिङ व्यवसाय नै बिक्री गर्ने तयारी गरेका छन् ।
