काठमाडौँ, १० बैशाख । राष्ट्रिय स्वतन्त्र पार्टी (रास्वपा) सभापति रवि लामिछानेको मुद्दा संशोधन प्रकरणको मुद्दा स्थगित गरिएको छ ।
उक्त मुद्दामा सुनुवाइका लागि बिहीबार (वैशाख १०) मा न्यायाधीश नृपध्वज निरौला, नित्यानन्द पाण्डेय र श्रीकान्त पौडेलको पूर्ण इजलास तय भएको थियो ।
यसअघि न्यायाधीश विनोद शर्मा र अब्दुल अजीज मुसलमानको संयुक्त इजलासमा भएको सुनुवाइपछि संवैधानिक जटिलताको प्रश्न देखिएको भन्दै पूर्ण इजलासमा पठाउने आदेश भएको थियो ।
महान्यायाधिवक्ता कार्यालयका नायब महान्यायाधिवक्ता सञ्जीवराज रेग्मीले अध्ययन गर्न समयको अभावमा मुद्दा स्थगित गरिएको जानकारी गराए । रेग्मीका अनुसार, बुधबार कार्यालय समय सकिनुअघि मात्रै महान्यायाधिवक्ता कार्यालयले पेसीको सूचना पाएको थियो । “मैले पनि बहसमा प्रतिनिधित्व गर्नुपर्ने थियो । म आज कार्यक्रममा जनकपुरमा छु । अध्ययन गर्न समयको अभावमा स्थगित गराइएको हो,” नायब महान्यायाधिवक्ता रेग्मीले भने ।
