काठमाडौँ, ९ बैशाख । नेकपा (एमाले)का महासचिव शङ्कर पोखरेलले फागुन २१ को निर्वाचनमा आफ्नो पार्टीले गत भदौ २३ र २४ प्रतिगामी घटनाबारे जनतालाई बुझाउन नसक्नु कमजोरी भएको बताएका छन् ।
आज पार्टी स्थापना दिवसका अवसरमा पार्टी कार्यालयमा आयोजित कार्यक्रमलाई सम्बोधन गर्दै उनले प्रतिगामी घटनाबारे जनतालाई बुझाउन नसक्दा निर्वाचनमा धक्का खान परेको बताए ।
उनले भने, ‘आम निर्वाचन २०८२ मा पार्टीले अनपेक्षित परिणाम बेहोर्नुपरेको छ । त्यसका पछाडि भदौ २३ र २४ को घटनाले नेपालको कम्युनिस्ट आन्दोलनमात्र होइन, लोकतान्त्रिक आन्दोलन, संविधान र नेपालको सम्प्रभुतामाथि नै गम्भीर चुनौतीहरू खडा गरेको छ’, ‘सोही कारण हामीले पार्टीका तर्फबाट त्यो घटना अग्रगमनतर्फको बाटो होइन, प्रतिगमनतर्फको बाटो भएकाले प्रतिनिधि सभा पुनर्स्थापनाको मान्यता अघि सार्यौँ ।’
पोखरेलले भदौ २३र २४ को दोस्रो भाग फागुन २१ को चुनाव भएको पनि दाबी गरे । ‘भदौ २३ र २४ को घटनाको भाग २ फागुन २१ को चुनाव हो’ पोखरेलले भने, ‘चुनावी परिणाम यस्तो आउनुमा भदौ २३ र २४ को घटनाबारे जनतालाई बुझाउन नसेको हो ।’
महासचिव पोखरेलले तर यो सच्चाइलाई एमालेबाहेक कसैले आत्मसात् गर्न नसकेको बताए ।
