काठमाडौँ, ६ बैशाख । धौलागिरि र अन्नपूर्ण हिमालमा यस वर्ष वसन्तयामको आरोहण शुरु भएको छ । पहिलो दिन २१ जनाले आरोहण गरेका छन् ।
आठ हजार ९१ मिटर अग्लो अन्नपूर्ण हिमाल म्याग्दीको अन्नपूर्ण गाउँपालिका–४ नारच्याङको भूगोलमा पर्छ । त्यस्तै धौलागिरि हिमाल म्याग्दीको धौलागिरि गाउँपालिका–४ मा रहेको छ ।
सेभेन समिट ट्रेकका लाक्पा शेर्पाको नेतृत्वमा सात जना नेपाली र पाँच जना विदेशी गरी १२ जना हिजो अन्नपूर्णको चुचुरो पुगेका हुन् । यस वर्ष अन्नपूर्ण हिमाल आरोहणका लागि पर्यटन विभागबाट चार समूहका २७ जनाले अनुमति लिएका छन् ।
उनीहरूबाट एक करोड २० लाख ४९ हजार १७५ राजस्व प्राप्त भएको विभागका शाखा अधिकृत शर्मिला बञ्जाडेले बताउनुभयो । अन्नपूर्ण विश्वको दशौँ अग्लो हिमाल हो । १९५० सालमा फ्रान्सका मौरिस हर्गोजले अन्नपूर्ण पहिलो पटक आरोहण गर्नुभएको थियो ।
त्यस्तै धौलागिरि हिमाल आरोहणका लागि पुगेका चार विदेशी र पाँच नेपाली नागरिकले हिजो यस वसन्तयामको पहिलो सफल आरोहण गरेका हुन् । धौलागिरिको चुचुरोमा पुगेर टोली तेस्रो आधार शिविरमा फर्किएको आरोहण टोलीको नेतृत्वकर्ता फुर ग्याल्जेन शेर्पाले बताउनुभयो ।
शेर्पाहरूको टोलीले हिउँमा डोरी तानेर बाटो तयार पारेपछि उनीहरूको सहयोगमा आरोही चुचुरोमा पुगेका हुन् । पर्यटन विभागका अनुसार वसन्तयाममा धौलागिरि आरोहणका लागि तीन समूहका १२ महिला र १६ पुरुषले अनुमति लिएका छन् ।
