एजेन्सी, ५ बैशाख । सिरियामा १२ वर्ष लामो अमेरिकी सैन्य उपस्थिति समाप्त भएको छ ।
हसाकास्थित कसराक एयरबेसबाट अमेरिकी सैनिकको अन्तिम दस्ता पनि बाहिरिएको हो । आफ्नो देशका करिब दुई हजार सैनिक त्यहाँबाट जोर्डनतर्फ प्रस्थान गरेका अमेरिकी सेन्ट्रल कमान्डले जनाएको छ ।
अमेरिकी सेनाको फिर्तीले सिरियाको विद्रोही कुर्द सेना सिरियन डेमोक्रेटिक फोर्सेसलाई सबैभन्दा बढी प्रभाव पारेको छ । अमेरिकी सुरक्षा छाता हटेपछि सिरियन डेमोक्रेटिक फोर्सेसले सिरियाली सरकारसँग सम्झौता गरेको छ । यसअन्तर्गत कुर्द लडाकुलाई अब सिरियाको राष्ट्रिय सेनामा समावेश गरिनेछ ।
हसाका र कामिश्लीजस्ता सहरमा अब सरकारी सैनिक तैनाथ भइसकेका छन् । साथै, अल–उमर र कोनिकोजस्ता प्रमुख तेल तथा ग्यास क्षेत्र सरकारको नियन्त्रणमा आएको छ । यसले सिरियाको अर्थतन्त्रलाई बलियो बनाउने अपेक्षा गरिएको छ ।
टर्कीले सिरियन डेमोक्रेटिक फोर्सेसलाई आतंकवादी संगठन मान्दै आएको छ । यही कारण अमेरिकी सेनाको फिर्तीपछि सम्भावित आक्रमणबाट जोगिन पनि सिरियन डेमोक्रेटिक फोर्सेसले सिरियाली सरकारसँग सहकार्य गर्नुपरेको हो ।
दशकौँको तनावपछि सिरिया र अमेरिकाबीचको सम्बन्धमा नाटकीय सुधार आएको छ । सन् २०२४ डिसेम्बरमा बशर अल–असदको सत्ता पतन भएपछि सिरियामा नयाँ राजनीतिक चरण सुरु भएको थियो । २०२५ मेमा साउदी अरेबियामा अमेरिकी राष्ट्रपति डोनाल्ड ट्रम्प र उनका सिरियाली समकक्षी अहमद अल–शाराबीच ऐतिहासिक भेटवार्ता भएको थियो । त्यसपछि अमेरिकाले सिरियामाथि लगाइएका अधिकांश प्रतिबन्ध हटाउने घोषणा गरेको थियो ।
सन् १८३५ मा सुरु भएको द्विपक्षीय सम्बन्ध २०१२ मा गृहयुद्धका कारण टुटेको थियो । त्यो हाल पुनर्स्थापनाको प्रक्रियामा छ ।
अमेरिकाले आफ्नो सैन्य उपस्थिति हटाए पनि सिरियामा सुरक्षा चुनौती अझै बाँकी रहेको जनाइएको छ ।
