काठमाडौँ, ४ बैशाख । टिकटकले सन् २०२५ अक्टोबर र डिसेम्बर दुई महिनामा नेपालबाट १९ लाख ३२ हजार बढी भिडियो हटाएको छ ।
चौथो त्रैमासिक (अक्टोबर–डिसेम्बर) अवधिको कम्युनिटी गाइडलाइन इन्फोर्समेन्ट रिपोर्टका अनुसार, नेपालमा मात्र टिकटकले १९ लाख ३२ हजार ५७५ वटा भिडियो हटाएको हो ।
सामग्री हटाउने दर ९९ दशमलव ९ प्रतिशत रहेकोमा ९८ दशमलव ४ प्रतिशत भिडियो २४ घण्टाभित्रै हटाइएको तथ्यांक सार्वजनिक गरिएको छ ।
विश्वव्यापी रूपमा हेर्दा, सोही अवधिमा टिकटकले १७ करोड ५३ लाख २ हजार ८५ भिडियो हटाएको छ । जुन कुल अपलोड सामग्रीको करिब ० दशमलव ५ प्रतिशत रहेको कम्पनीले जनाएको छ ।
हटाइएका सामग्रीमध्ये १५ करोड २५ लाख ८० हजार ९३३ भिडियो स्वचालित प्रविधिमार्फत पहिचान गरिएको थियो । यस्तै ८३ लाख ६० हजार ७८० भिडियो पुनरावलोकनपछि पुनःस्थापना गरिएको कम्पनीले जनाएको छ । समग्र सक्रिय हटाउने दर ९९ दशमलव १ प्रतिशत कायम रहेको छ ।
प्लेटफर्मको विश्वसनीयता कायम राख्न टिकटकले १४ करोड ७७ लाख १६ हजार ५१८ नक्कली खाता हटाएको छ । यसका साथै १३ वर्षभन्दा कम उमेरका हुन सक्ने आशंकामा थप २ करोड ३८ लाख ७५ हजार ८७९ खातासमेत हटाइएको उल्लेख गरिएको छ ।
