काठमाडौँ, २६ चैत । बलिउड अभिनेता रणवीर सिंहको चलचित्र ‘धुरन्धर २’ ले भारतीय बक्स अफिसमा सुनामी ल्याएको छ ।
प्रदर्शनको २० दिनभित्रै चलचित्रले भारतमा मात्र १,०३३.३७ करोड भारुको नेट कलेक्सन गर्दै ऐतिहासिक सफलता हात पारेको हो ।
यो कमाइसँगै ‘धुरन्धर २’ ले एसएस राजामौलीको सदाबहार ब्लकबस्टर ‘बाहुबली २’ को घरेलु कलेक्सन (१,०३०.४२ करोड) लाई समेत उछिनेको छ । अब यस चलचित्रको अगाडि अल्लु अर्जुनको ‘पुष्पा २’ को मात्र रेकर्ड बाँकी छ ।
भारतमा सबैभन्दा बढी कमाउने चलचित्रको कीर्तिमान रच्न ‘धुरन्धर २’ अझै २००.६३ करोड रुपैयाँले पछि छ । ‘पुष्पा २’ को भारतमा कुल नेट कलेक्सन १,२३४.१० करोड रहेको छ । विश्वव्यापी व्यापारको कुरा गर्दा रणवीरको यो चलचित्रले अहिलेसम्म १,६४१.२१ करोड ग्रस कलेक्सन गरिसकेको छ, जसमा वैदेशिक बजारको योगदान ४०४ करोड रुपैयाँ छ ।
‘धुरन्धर २’ ले भारतमा १०० करोडदेखि १००० करोडसम्मका सबै कोशेढुंगाहरू सबैभन्दा छोटो समयमा पार गरेको छ। साथै, उत्तर अमेरिकामा २५ मिलियन डलर र जर्मनीमा १ मिलियन युरो कमाउने पहिलो भारतीय चलचित्र बनेर यसले विश्व बजारमा नयाँ मानक स्थापित गरेको छ।
