काठमाडौँ, १४ चैत । निर्देशक आदित्य धरको स्पाइ-एक्सन थ्रिलर फिल्म ‘धुरन्धर २ : द रिभेन्ज’ ले प्रदर्शनको पहिलो आठ दिनमै भारतीय सिनेमामा नयाँ इतिहास रचेको छ ।
यो फिल्म बिहीबार, मार्च १९ मा हलमा रिलिज भएको थियो । त्यसअघि मार्च १८ को साँझ पेड प्रिमियर शोसमेत राखिएको थियो । उक्त प्रिमियर शोबाटै रणवीर सिंह अभिनित यो सिक्वेलले रेकर्ड बनाउन सुरु गरेको थियो ।
अघिल्लो भाग ‘धुरन्धर पार्ट १’ ले ८६ दिनमा विश्वव्यापी रूपमा १,३०७ करोड भारु कमाएको थियो । तर ‘धुरन्धर २’ ले भने केवल ८ दिनमै विश्वभर १,०७९ करोड भारु कमाइसकेको छ ।
कमाइको गति यति तीव्र छ कि बक्स अफिसमा हरेक दिन नयाँ कीर्तिमान बनिरहेका छन् । बलिउड मात्र होइन, दक्षिण भारतीय फिल्मका पुराना रेकर्डसमेत यसले तोड्दै गएको छ ।
