काठमाडौँ, ३ पौष । प्रतिनिधिसभा अन्तर्गत शिक्षा तथा स्वास्थ्य समितिले देशभर रहेका शिक्षा र स्वास्थ्य क्षेत्रका समस्यालाई समाधान गर्न तत्कालै अनुगमनलाई तिव्रता दिने भएको छ ।
आज समितिको कार्यालय सिंहदरबारमा बसेको समितिको बैठकले सात वटै प्रदेशमा सम्बन्धीत निकाय तथा प्रशासन कार्यालयलाई संयुक्त रुपमा छलफल गर्दै समस्या समाधान गर्ने विकल्पको खोजी गर्ने भएको हो ।
त्यस्तै समितिले देशका मुख्य मुख्य क्षेत्रका अस्पतालहरुमा निरिक्षण तथा अनुगमन गर्दै स्वास्थ्य क्षेत्रमा आवश्यक पर्ने स्रोत तथा साधनहरु भए नभएको मूल्याङ्कन गरि अघि बढ्ने समेत निर्णय गरेको छ ।
कार्यक्रममा प्रतिनिधिसभा सदस्य तथा उक्त समितिका सदस्य मनकुमारी जिसीले समतिले सात वटै प्रदेशको छलफलबाट आएको निश्कर्षलाई व्यवहारिक रुपमा लागु गर्न आवश्यक निर्देशानात्मक रुपमा अघि बढ्नु पर्नेमा जोड दिनुभएको छ ।
त्यस्तै समितिका सदस्य खगराज अधिकारीले दिनानुदिन सांसदमाथि मिडियाले चरणवद्ध रुपमा गरको आक्रमणप्रति आपत्ति व्यक्त गर्नुभयो । उहाँले जनताबाट आएको गुनासोलाई तत्काल समाधान गर्नुपर्ने बताउनुभयो ।
समितिले आगामी दिनमा समितिको काम कारवाहीलाई अझ बढी प्रभावकारी बनाउन खगराज अधिकारीको संयोजकत्वमा सात सदस्यिय उपसमिति समेत गठन गरेको छ । सदस्यहरुमा उमाकान्त चौधरी, मन कुमारी जिसी, गगन कुमार थापा, भैरब बहादुर सिंह, नमिता कुमारी चौधरी र हितबहादुर तामाङ रहनुभएको छ ।
