काठमाडौँ, ११ फागुन । केरलको कोच्चिमा आयोजित ७० औँ साउथ फिल्मफेयर अवार्ड्समा बलिउडका महानायक अमिताभ बच्चनले इतिहास रचेका छन् ।
फिल्म ‘कल्कि २८९८ एडी’ मा अश्वत्थामाको भूमिका निभाएका उनले तेलुगु विधामा उत्कृष्ट सहायक अभिनेता (पुरुष) को अवार्ड जितेका हुन् ।
दक्षिण भारतीय फिल्मका लागि उनले प्राप्त गरेको यो पहिलो फिल्मफेयर अवार्ड हो । सन् २०२४ जुन २७ मा प्रदर्शनमा आएको यस फिल्मले विश्वभर १ हजार करोडभन्दा बढीको व्यापार गरेर नयाँ रेकर्ड कायम गरेको थियो। यद्यपि, कोच्चिमा आयोजित भव्य समारोहमा अमिताभ स्वयं भने उपस्थित हुन सकेनन् ।
यस पटकको अवार्ड समारोहमा तेलुगु, तमिल, मलयालम र कन्नड फिल्म उद्योगका उत्कृष्ट कलाकार र चलचित्रहरूलाई सम्मान गरिएको छ। तेलुगु विधातर्फ ‘पुष्पा २’ को वर्चस्व रह्यो, जसले उत्कृष्ट फिल्म, उत्कृष्ट निर्देशक र उत्कृष्ट अभिनेता (अल्लू अर्जुन) सहित पाँचवटा अवार्ड आफ्नो पोल्टामा पार्न सफल भयो ।
