एजेन्सी, १४ माघ । भारतका गोवा र आन्ध्र प्रदेश राज्यले १६ वर्षभन्दा कम उमेरका बालबालिकालाई सामाजिक सञ्जाल प्रयोगमा प्रतिबन्ध लगाउनेबारे अध्ययन भइरहेको बताइएको छ ।
गोवाका सूचना प्रविधि मन्त्री रोहन खाँटेले राज्य सरकारले अष्ट्रेलियाको कानुन अध्ययन गरिरहेको बताएका छन् । उनले सम्भव भएमा १६ वर्षभन्दा कम उमेरका बालबालिकाको सामाजिक सञ्जाल प्रयोगमा प्रतिबन्ध लगाइने जानकारी दिएका छन् ।
त्यस्तै, आन्ध्र प्रदेशका आईटी मन्त्री नारा लोकेशले पनि बालबालिकाको सामाजिक सञ्जाल प्रयोग सीमित गर्ने योजना बनाइँदै गरेको बताएका छन् । उनका अनुसार सानो उमेरका बालबालिकाले सामाजिक सञ्जालमा देखाइने सामग्री राम्रोसँग बुझ्न नसक्ने भएकाले कडा कानुनी व्यवस्था आवश्यक छ ।
यसैबिच, अष्ट्रेलियापछि फ्रान्सले पनि सामाजिक सञ्जाल प्रतिबन्धसम्बन्धी विधेयक पारित गरिसकेको छ । इन्डोनेसिया र मलेसियाजस्ता देशहरू पनि यस्तै कानुन बनाउने तयारीमा छन् । भारतमा यसअघि मद्रास उच्च अदालतले केन्द्र सरकारलाई बालबालिकाको सामाजिक सञ्जाल प्रयोगबारे कडा कानुन बनाउने सम्भावना खोज्न सुझाव दिएको थियो ।
