काठमाडौँ, १३ माघ । फिल्म ‘कल्ली’ को प्रदर्शन स्थगित भएको छ । फिल्म १ फागुनदेखि देशव्यापी प्रदर्शन तयारीमा थियो । चुनावका कारण फिल्मको प्रदर्शन स्थगित गरिएको हो ।
फिल्म निर्माण संस्था लेकाली इन्टरटेनमेन्ट प्रालिका तर्फबाट किरण नेपालीले सोमबार विज्ञप्ति जारी गर्दै निर्वाचनको कारण फिल्मको प्रदर्शन स्थगित गरेको बताए । उनले सहज वातावरण बनेलगत्तै नयाँ प्रदर्शन मिति घोषणा गर्ने जानकारी दिए ।
विज्ञप्तिमा भनिएको छ, ‘हामीले आगामी फागुन १ गतेलाई ‘कल्ली’को सार्वजनिक प्रदर्शन मिति तय गरेका थियौँ । तर, वर्तमान परिस्थितिमा हाम्रो प्यारो देश निर्वाचनमा होमिएको छ । राष्ट्रको भविष्य के हुने हो भन्ने महत्त्वपूर्ण र जटिल घडीमा सम्पूर्ण नागरिकको ध्यान र राज्यको प्राथमिकता देशको राजनीति र निर्वाचनतर्फ केन्द्रित हुनु स्वाभाविक र आवश्यक पनि हो। हामी विश्वास गर्छौँ- पहिले देश, अनि मात्र कला र मनोरञ्जन ।’
