एजेन्सी, ४ पौष । युरोपियन युनियन (ईयू)ले डिसेम्बर १८ मा एक ऐतिहासिक सम्झौताअन्तर्गत ‘सेफ कन्ट्री अफ ओरिजन’ (सुरक्षित मूल देशहरू)को पहिलो विश्वव्यापी सूची तयार गरेको छ ।
यस सूचीमा भारत, बंगलादेश, मोरक्को, ट्युनिसिया, इजिप्ट, कोसोभो र कोलम्बियालाई समावेश गरिएको छ ।
यो कदमको मुख्य उद्देश्य सुरक्षा कारणले शरण दिन योग्य नभेटिएका शरणार्थीहरूका आवेदनहरूलाई छिटोछरितो रूपमा सुल्झाउनु र तिनीहरूलाई आफ्नो देश फर्काउनु हो ।
यस नयाँ नियमअनुसार, यी देशहरूबाट आउने व्यक्तिहरूलाई अब स्वतः शरण दिइने छैन । तिनीहरूका आवेदनहरूको तीव्र प्रक्रियाअन्तर्गत जाँच गरिनेछ ।
युरोपेली संघको भनाइमा यी देशहरूमा कुनै सामान्य उत्पीडन वा सशस्त्र द्वन्द्व छैन, तसर्थ त्यहाँका नागरिकहरूलाई शरणको आवश्यकता कम पर्छ ।
यसबाहेक, अल्बानिया, मोन्टेनेग्रो र टर्कीजस्ता युरोपेली संघको सदस्यताका उमेदवार देशहरूलाई पनि सामान्यतया सुरक्षित मानिनेछ ।
युरोपेली आयोगेले यी देशहरूको अवस्थाको निरन्तर निगरानी गर्ने बताएको छ । यदि, कुनै देशमा अवस्था बिग्रियो वा कुनै सशस्त्र द्वन्द्व सुरु भयो भने, त्यसको सुरक्षित श्रेणीलाई अस्थायी रूपमा निलम्बन गरिनसक्छ ।
यद्यपि, प्रत्येक शरण आवेदनको व्यक्तिगत जाँच अझै गरिनेछ, तर सम्पूर्ण प्रक्रिया अब पहिलेको तुलनामा धेरै छिटो हुनेछ । यो सूची सबै सदस्य देशहरूका लागि कानुनी रूपमा बाध्यकारी हुने बताइएको छ ।
