एजेन्सी, १६ मंसिर । पाकिस्तानका पूर्वप्रधानमन्त्री इमरान खानको पार्टी पाकिस्तान तहरीक–ए–इन्साफ (पीटीआई)ले विरोध प्रदर्शनको आह्वान गरेपछि इस्लामाबाद र रावलपिण्डीमा धारा १४४ लागु गरिएको छ ।
दुवै सहरका प्रशासनले धारा १४४ अन्तर्गत कुनै पनि प्रकारको विरोध प्रदर्शन वा सभा गर्न अनुमति नभएको जनाएका छन् ।
बीबीसी उर्दुका अनुसार, पीटीआईसँग सम्बन्धित सबै सांसदले मंगलबार इस्लामाबाद उच्च अदालत र अदियाला जेलबाहिर शान्तिपूर्ण विरोध प्रदर्शनको तयारी गरेका छन् ।
खैबर पख्तुनख्वाका मुख्यमन्त्री सोहेल अफ्रिदीले आइतबार यो विरोध प्रदर्शनको घोषणा गरेका थिए । उनले विधानसभाका सदस्य मात्र प्रदर्शनमा भाग लिने र कोही कार्यकर्ता यसमा सामेल नहुने स्पष्ट पारेका थिए ।
सोहेलका अनुसार, इस्लामाबाद उच्च अदालतबाहिर विरोध प्रदर्शनको उद्देश्य इमरान र उनकी पत्नी बुशरा बीबीविरुद्ध दर्ता गरिएका मुद्दाको छिटो सुनुवाइ निश्चित गर्नु हो ।
पूर्वप्रधानमन्त्री इमरान विगत दुई वर्षभन्दा बढी समयदेखि रावलपिण्डीको अदियाला जेलमा बन्दी छन् । उनलाई करिब दुई हजार करोड रुपैयाँबराबरको भ्रष्टाचारको एक मुद्दामा अदालतले सजाय सुनाएको छ ।
