काठमाडौँ, २३ कार्तिक । भारतको राजधानी दिल्लीमा वायुको गुणस्तर अत्यन्तै खराब अवस्थामा पुगेको छ ।
बिहान ७ बजे औषत वायु गुणस्तर सूचकाङ्क (एक्यूआई) तीन सय ९१ रहेको थियो । त्यसपछि बढेर दिल्लीको औसत वायु गुणस्तर सूचकाङ्क (एक्यूआई) छ सय २१ सम्म पुगेको थियो । अहिले केही घटे पनि चार सय ५० भन्दा माथि नै छ । दिल्ली विश्वकै प्रदूषित शहर बनेको छ ।
सरकारलाई प्रदूषण रोक्न आवश्यक पहल गर्न नागरिकले दबाब स्वरुप शान्तिपूर्ण प्रदर्शन समेत गर्दै आएका भारतीय सञ्चारमाध्यमले जनाएका छन् । दिल्लीपछि पाकिस्तानको लाहोर वायुको गुणस्तर सूचीको दोस्रो स्थानमा छ ।
लाहोरमा पनि बिहान एक्यूआई तीन सयभन्दा माथि रह्यो । अहिले केही घटेको छ । बढ्दो वायु प्रदूषणले स्वास्थ्यसम्बन्धी जोखिम बढाएको भन्दै विज्ञले मानिसलाई सकेसम्म घरभित्रै बस्न र बाहिर निस्कदा मास्कको प्रयोग गर्न सुझाव दिँदै आएका छन् ।
