एजेन्सी, २० कार्तिक । फिलिपिन्समा आएको शक्तिशाली टाइफुन कल्मेगी आँधीका कारण अहिलेसम्म कम्तीमा एक सय जनाको मृत्यु भएको छ । हजारौ मानिस घरबारविहीन भएको अन्तर्राष्ट्रिय सञ्चार माध्यमहरुले जनाएका छन् ।
मुख्यगरी सेबु प्रान्तमा ठूलो वर्षा र बाढीका कारण ४९ जनाको ज्यान गएको र ७५ जना अझै बेपत्ता भएका बीबीसीले जनाएको छ । मंगलवार बिहान प्रवेश गरेको आँधीले झन्डै एक सय ३० किलोमिटर प्रतिघण्टासम्मको हावा र मुसलधारे वर्षा गराएको थियो । घरहरूमा पानी पसेर मानिसहरू छानामा आश्रय लिन बाध्य भएका छन् ।
उद्धारका लागि पठाइएको एक सैन्य हेलिकप्टर समेत दुर्घटना हुँदा चालक दलका ६ जनाको ज्यान गएको छ । फिलिपिन्सको राष्ट्रिय विपद् व्यवस्थापन एजेन्सीका अनुसार चार लाखभन्दा बढी मानिस विस्थापित भएका छन् ।
