एजेन्सी, १९ कार्तिक । अमेरिकाको केन्टकी राज्यको लुइसभिल मुहमध अलि अन्तर्राष्ट्रिय विमानस्थलमा कार्गो विमान दुर्घटना भएको छ ।
विमानस्थलबाट उडान भरेको केही मिनेटमै यूपीएस फ्लाईट २९७६ नामक कार्गो विमान दुर्घटनाग्रस्त भएको हो । स्थानीय समय अनुसार हिजो बेलुका सवा ५ बजे विमान दुर्घटनापछि आकाशमा ठूलो धुवाँको मुस्लो देखिएको बीबीसीले जनाएको छ ।
नागरिक उड्यन एजेन्सीका अनुसार विमानले लुइसभिलबाट होनोलुलुका लागि उडान भरेको थियो । विमानमा तीन जना चालकदलका सदस्य रहेको खबरमा उल्लेख छ । तर उनीहरूको अवस्था अहिलेसम्म सार्वजनिक गरिएको छैन । दुर्घटनापछि विमानस्थल वरिपरि ठूलो आगलागी भएको र धुवाँले आकाश ढाकिएको दृश्य स्थानीयबासिन्दाले भिडियोमा खिचेका छन् । जोखिमका कारण विमानस्थलको ५ माइल वरिपरि प्रवेश निषेध गरिएको छ ।
