एजेन्सी, ३ कार्तिक । इजरायली सेना (आईडीएफ) ले गाजामा युद्धविराम र सहायता पुनः शुरू गर्ने बताएको छ । आईडीएफले हमासले युद्धविराम सम्झौता उल्लङ्घन गरेको आरोप लगाउँदै गाजामा हवाई आक्रमण गरेको थियो ।
आईडीएफले रफाहमा रहेका आफ्ना सैनिकहरूलाई ‘आतङ्ककारीहरू’ ले आक्रमण गरेको, ट्याङ्क विरोधी मिसाइल प्रहार गरेको र गोली चलाएको बताएको छ । आक्रमणमा दुई सैनिकको ज्यान गएको छ ।
यसैबीच हमासले इजरायल नियन्त्रित क्षेत्रमा झडपका बारेमा कुनै जानकारी नभएको बताएको बीबीसीले जनाएकाे छ । आफूहरू युद्धविरामप्रति प्रतिबद्ध रहेको हमासकाे भनाइ छ ।
हिजो बेलुका इजरायली सेनाले गाजाभरि हमासको लक्ष्यमा आक्रमण गरेको बताएको छ । इजरायली आक्रमणमा ४४ जनाको ज्यान गएको अस्पताल स्रोतहरूलाई उद्धृत गर्दै खबरमा उल्लेख छ ।
यसैबीच अमेरिकी राष्ट्रपति डोनाल्ड ट्रम्पले आफूले मध्यस्थता गरेको युद्धविराम अझै पनि कायम रहेको बताउनुभएको छ । एअर फोर्स वान विमानमा चढ्ने क्रममा पत्रकारसँग कुरा गर्दै ट्रम्पले युद्धविराम उल्लङ्घनमा हमास नेतृत्व संलग्न नभएको उल्लेख गर्नुभएको खबरमा उल्लेख छ ।
