काठमाडौँ, १२ भदौ । नेपाली राष्ट्रिय क्रिकेट टोलीले साउथ अस्ट्रेलियासँगको पहिलो अभ्यास खेलमा तीन विकेटको हार व्यहोरेको छ ।
बिहीबार नेपालले प्रस्तुत गरेको १४७ रनको लक्ष्य साउथ अस्ट्रेलियाले निर्धारित २० ओभरमा सात विकेट गुमाएर पूरा गर्यो । साउथ अस्ट्रेलियाका विन्टरले ३६ रन बनाए । होगनबोइजिमले २८, कप्तान हार्वेले २७, ड्रियुले २४ र मनेन्टीले २२ रन जोडे । नेपालका सोमपाल कामीले तीन विकेट लिए । नन्दन यादवले दुई र कप्तान रोहितकुमार पौडेलले एक विकेट लिए ।
त्यसअघि, टस हारेर ब्याटिङको निम्तो पाएको नेपालले २० ओभरमा नौ विकेट गुमाएर १४६ रन बनाएको थियो । नेपालका भीम सार्कीले ३२ रनको योगदान गरे । दीपेन्द्रसिंह ऐरीले २६, आसिफ शेखले २२, आरिफ शेखले २१ र सोमपाल कामीले अविजित १८ रन बनाए ।
साउथ अस्ट्रेलियाका थोम्पसन, ब्राउन र मेनेन्टीले समान दुई विकेट लिए । म्याकफाडेन र मेन्जिसले समान एक विकेट लिए ।
नेपालले आजै साउथ अस्ट्रेलियासँग दोस्रो अभ्यास खेल खेल्ने तालिका छ । गएको मंगलबार नेपालले दुई अभ्यास खेलमा क्रिकेट एसीटीविरुद्ध क्रमशः ४१ र ६ विकेटको जित निकालेको थियो ।
