एजेन्सी, ३ भदौ । युक्रेनी राष्ट्रपति भोलोडिमिर जेलेन्स्कीले अमेरिकी राष्ट्रपति डोनाल्ड ट्रम्पबीच भेटवार्ता भएको छ ।
जेलेन्स्कीले ट्रम्पसँगको भेटवार्ता सकारात्मक भएको बताएका छन् । ट्रम्पसँग वार्ता पछि ह्वाइट हाउस बाहिर पत्रकारहरूसँग कुरा गर्दै जेलेन्स्कीले भने, “वार्ता राम्रो र सामान्य भयो।” उनका अनुसार, बैठकमा उनले ट्रम्प र युरोपेली नेताहरूसँग मिलेर युक्रेनका लागि सुरक्षा प्रत्याभूतिबारे छलफल गरेका थिए ।
जेलेन्स्कीले ट्रम्पबाट युक्रेन पनि यस्ता सुरक्षा प्रत्याभूतिमा समावेश हुने महत्त्वपूर्ण सङ्केत प्राप्त गरेको बताए । उनले युद्ध अन्त्यका लागि पुटिनसँग जुनसुकै स्वरूपको बैठक गर्न युक्रेन तयार रहेको पनि स्पष्ट पारे ।
जेलेन्स्कीले युद्ध अन्त्यका प्रयासका लागि ट्रम्प र रुसी राष्ट्रपति भ्लादिमिर पुटिनसँग तीन पक्षीय वार्तामा सहभागी हुन तयार रहेको बताएका छन् ।
वासिङ्टन पुगेका जेलेन्स्कीले व्हाइट हाउसमा पत्रकारहरूसँग कुरा गर्दै भने, “हामी तीन पक्षीय वार्ताका लागि तयार छौँ।” उनका अनुसार, यस्तो वार्ता युक्रेन–रुस युद्धको समाधान खोज्न महत्त्वपूर्ण अवसर प्रदान गर्न सक्छ र यसले सङ्घर्षबाट पीडित नागरिकहरूलाई राहत दिन सक्छ ।
