एजेन्सी, २८ साउन । युरोपेली सङ्घले प्लास्टिक प्रदूषण अन्त्यका लागि विश्वव्यापी सन्धिमा सहमति जनाउन तयार रहेको स्पष्ट पारेको छ, तर अन्यायपूर्ण वा अविचारित सम्झौता आफूलाई मान्य नहुने बताएको छ ।
संयुक्त राष्ट्रसङ्घको आयोजनामा जिनेभामा भइरहेको बहुपक्षीय वार्ता अब दुई दिनमै टुङ्ग्याउनु पर्ने चरणमा पुगेको छ । यस्तो अवस्थामा युरोपेली सङ्घका वातावरण आयुक्त जेसिका रोस्वालले तेल उत्पादक मुलुक र प्लास्टिक नियन्त्रणको पक्षमा रहेका देशहरूबिच अब सहमतिको समय आएको बताइन् ।
उनले भनिन्,“हामी प्लास्टिक प्रयोग गर्छौँ र भविष्यमा पनि यसको आवश्यकता हुनेछ, तर प्लास्टिक प्रदूषणलाई सहन सकिँदैन । त्यसैले अब यस समस्यालाई यथाशीघ्र अन्त्य गर्नुपर्छ ।”
दुई पक्षबीच अझै ठूलो मतभेद रहेको देखिएको छ । साउदी अरेबिया, कुवेत, रसिया र इरान जस्ता तेल उत्पादन गर्ने देशहरू मिलेर बनेको समूहले सन्धि केवल फोहोर व्यवस्थापनमा सीमित राख्नुपर्ने अडान राखेका छन् । तर युरोपेली सङ्घसहित अन्य राष्ट्रहरू भने प्लास्टिकको उत्पादनमा नै नियन्त्रण गर्नुपर्ने र विषाक्त रसायनहरूको प्रयोग क्रमशः बन्द गरिनुपर्ने पक्षमा उभिएका छन् ।
