काठमाडौँ, ९ साउन । एनएसजेएफ बजाज पल्सर स्पोर्ट्स अवार्डको २२औँ संस्करण पर्यटकीय राजधानी पोखरामा हुने भएको छ ।
नेपाली खेलकुद पत्रकारको छाता संगठन नेपाल खेलकुद पत्रकार मञ्च (एनएसजेएफ)को आयोजनामा प्रत्येक वर्ष हुँदै आएको यो अवार्ड भदौ अन्तिम साता पोखरामा हुने भएको हो ।
मञ्चले शुक्रबार काठमाडौंमा आयोजित पत्रकार सम्मेलनमार्फत अवार्डको २२औँ संस्करण भदौ २९ गते हुने जनाएको हो । अवार्डमा १० विधा समावेश गरिएको मञ्चका महासचिव अञ्जन खड्काले बताए ।
वर्षका उत्कृष्ट पुरुष खेलाडी, वर्षका उत्कृष्ट महिला खेलाडी, वर्षका उत्कृष्ट युवा खेलाडी, वर्षका उत्कृष्ट प्रशिक्षक, पिपल्स च्वाइस अवार्ड, पारा एथलिट सम्मान, स्पेसल अवार्ड, टिम अफ दी एयर, लाइफटाइम अचिभमेन्ट अवार्ड, एसियन स्पोट्र्स जर्नालिस्ट अवार्ड विधा रहने महासचिव खड्काले जनाए ।
अवार्डका निम्ति खेलाडी छनोट गर्न समिति समेत बनाइसकेको मञ्चले जनाएको छ । अवार्डको उत्कृष्ट पुरुष, महिला, युवा, प्रशिक्षक र पिपल्स च्वाइसमा समान पाँच खेलाडी मनोनयन गरिने महासचिव खड्काले बताए । यी पाँच विधाका विजेता समान एक थान बजाज पल्सर मोटरसाइकल पाउने छन् ।
यस्तै, पारा एथलिट सम्मान, स्पेसल अवार्ड, टिम अफ दी इयर र लाइफटाइम अचिभमेन्ट अवार्डका विजेताले समान एक लाख रुपैयाँ पाउने छन् ।
यस्तै, शुक्रबारको कार्यक्रममा अवार्डको प्रमुख प्रायोजक गोल्छा समूह र मञ्चबीचको सम्झौतासमेत नवीकरण भएको छ । सम्झौताअनुसार, गोल्छा समूहले आगामी पाँच वर्षसम्म एनएसजेएफ अवार्डलाई मुख्य प्रायोजन गर्नेछ ।
