पेरिस, ९ साउन । फ्रान्सका राष्ट्रपति इमानुएल म्याक्रोँले सेप्टेम्बरमा फ्रान्सले प्यालेस्टाइन राज्यलाई आधिकारिक रूपमा मान्यता दिने घोषणा गरेका छन् ।
यो निर्णयसँगै फ्रान्स प्यालेस्टाइनलाई मान्यता दिने पहिलो जी सेभेन राष्ट्र बन्नेछ । म्याक्रोँले एक्समा गरेको पोस्टमा न्यूयोर्कमा हुने संयुक्त राष्ट्र संघको महासभाको एक सत्रमा औपचारिक घोषणा गरिने बताएका छन् ।
उनले लेखेका छन्, ‘आजको तत्काल आवश्यकता गाजा युद्ध अन्त्य गर्नु र नागरिकलाई बचाउनु हो। शान्ति सम्भव छ । हामीलाई तत्काल युद्धविराम, सबै बन्धकहरूको रिहाइ, र गाजाका मानिसहरूलाई ठुलो मात्रामा मानवीय सहायता आवश्यक छ।’
प्यालेस्टिनी अधिकारीहरूले म्याक्रोँको निर्णयको स्वागत गरेका छन्, जबकि इजरायली प्रधानमन्त्री बेन्जामिन नेतन्याहूले हमासको ७ अक्टोबर २०२३ को इजरायलमा भएको आक्रमणपछि यो कदमले ‘आतंकलाई पुरस्कृत’ गर्ने बताएका छन् ।
अमेरिकी विदेश सचिव मार्को रुबियोले म्याक्रोँको घोषणालाई ‘कठोर’ भन्दै संयुक्त राज्य अमेरिकाले यसलाई ‘कडा रूपमा अस्वीकार’ गर्ने बताएका छन् ।
