एजेन्सी, २४ चैत । राष्ट्रपति डोनाल्ड ट्रम्प प्रशासनले क्यालिफोर्निया राज्यका विभिन्न विश्वविद्यालयहरुका दर्जनौं अन्तर्राष्ट्रिय विद्यार्थीहरूको भिसा रद्द गरेको लस एन्जेलस टाइम्सले जनाएको छ ।
क्यालिफोर्निया विश्वविद्यालय, लस एन्जेलसका शिक्षक र विद्यार्थीहरूले जनाएअनुसार कम्तिमा नौ अन्तर्राष्ट्रिय विद्यार्थीहरूको भिसा रद्द भएको छ । ती विद्यार्थीहरूलाई आप्रवासी प्राधिकरणले पक्राउ गरेको हो । तर उनीहरूको भिसा किन रद्द भयो भन्नबारे जानकारी दिइएको छैन ।
यसैगरी क्यालिफोर्निया विश्वविद्यालय, शान डिएगोका कुलपति प्रदीप खोस्लाले शुक्रबार साँझ पाँच विद्यार्थीहरूको भिसा रद्द भएको बताएका छन् । उनका अनुसार बिना कुनै पूर्व जानकारी विश्वविद्यालयले यो सूचना प्राप्त गरेको हो ।
यसबाहेका अर्को एक जना विद्यार्थीलाई अध्यागमनमा रोकेर प्रवेश नदिएपछि आफ्नो देश फिर्ता पठाइएको पनि उनले बताए ।
क्यालिफोर्निया विश्वविद्यालय, बर्कलेका प्रवक्ताले पनि चारजना विद्यार्थीको भिसा रद्द भएको पुष्टि गरे । उनका अनुसार रद्द भएको दुई भिसा हाल स्नातक र स्नातकोत्तर गरिरहेका विद्यार्थी र रद्द भएको अन्य दुई भिसा हालै स्नातक गरेका विद्यार्थीहरूको थियो ।
क्यालिफोर्निया विश्वविद्यालय, डेभिसका सात जना विद्यार्थी र पाँच जना हालै स्नातक गरेका विद्यार्थीहरूको भिसा रद्द भएको बताइएको छ । यसका साथै स्ट्यानफोर्ड यूनिभर्सिटीका चारजना अध्यानरत विद्यार्थी र दुई जना हालै स्नातक गरेका विद्यार्थी हरूको भिसा रद्द भएको विश्वविद्यालयले बताएको छ ।
