काठमाडौँ, ५ चैत । ब्राजिलमा चमेरोमा नयाँ नोभल कोरोनाभाइरस फेला परेको छ ।
जुन मर्स (मिडल इस्ट रेस्पिरेटरी सिन्ड्रोम) भाइरससँग मिल्दोजुल्दो रहेको बताइएको छ । जर्नल अफ मेडिकल भाइरोलोजीमा प्रकाशित एउटा लेखमा ब्राजिल र चीनका केही वैज्ञानिकहरूले यो नयाँ भाइरस पत्ता लगाएको उल्लेख छ ।
ब्राजिलमा पाइने यो भाइरसको मर्स-कोभ (MERS-CoV) सँग धेरै समानताहरू छन् । मर्स-कोभले ज्वरो, खोकी, सास फेर्न गाह्रो हुने जस्ता लक्षणहरू सहितको भाइरल श्वासप्रश्वास रोग निम्त्याउँछ । यो भाइरसबाट संक्रमित व्यक्तिमा निमोनियाको जोखिम पनि बढी हुन्छ । यस भाइरसको संक्रमणका कारण झाडापखाला जस्ता पाचन समस्या पनि हुन सक्छ ।
यो नयाँ भाइरसको जीनोमको ७२% भाग मर्स-कोभसँग मिल्दोजुल्दो पाइएकोले वैज्ञानिकहरूमाझ यो नयाँ भाइरसको बारेमा चिन्ता बढ्दै गएको छ । यसको स्पाइक प्रोटिन (होस्ट सेलमा जोडिने भाइरसको भाग) को मर्स-कोभसँगको समानताले चिन्ता बढाएको हो ।
