काठमाडौँ, १८ फागुन । इटालीका विश्वकप विजेता गोलकिपर जियानलुइजी बुफोन नेपाल आएका छन् ।
राष्ट्रिय युवा संघको आयोजनामा भइरहेको केपी ओली कपको फाइनल खेलका निम्ति उनी आइतबार नेपाल आएका हुन् ।
इटालीले सन् २००६ मा फ्रान्सलाई हराएर विश्वकपको उपाधि जित्दा बुफोन प्रतियोगिताको उत्कृष्ट गोलकिपर चुनिएका थिए । उनले इटालीबाट १७६ अन्तर्राष्ट्रिय खेलमा प्रतिनिधित्व गरेका छन् ।
सन् १९९७ मा अन्तर्राष्ट्रिय फुटबलमा डेब्यू गरेका बुफोनले सन् २०१८ मा सन्न्यास लिएका थिए । उनले व्यावसायिक फुटबलबाट भने सन् २०२३ मा सन्न्यास लिएका थिए ।
