एजेन्सी, १ फागुन । म्यानमारको कारेन राज्यमा साइबर ठगी चलाइरहेका ‘स्क्याम सेन्टर’ हरूबाट सयौँ विदेशीलाई रिहा गरिएको छ ।
त्यहाँको जनजातीय सशस्त्र समूहले त्यस्तास्क्याम सेन्टरमा जबर्जस्ती काम गर्न बाध्य २० देशका २५० भनदा धेरै नागरिकलाई रिहा गरेका हुन् । यिनीहरू सबैलाई थाइल्यान्ड ल्याइ पुर्याइएको बताइएको छ । यी कामदारहरूमध्ये आधाभन्दा धेरै अफ्रिकी वा एसियाली मूलको भएको बताइएको छ ।
यी मानिसहरू मानव तस्करीबाट पीडित थिए कि थिएन भनेर खोजबिन भइरहेको बताइएको छ । गएको हप्ता थाई प्रधानमन्त्री पेतोङतार्न शिनावात्राले चिनियाँ राष्ट्रपति सी चिनफिङलाई भेटेकी थिइन् । यस भेटमा उनले थाइल्यान्ड र म्यानमारको सीमामा मौलाइरहेका स्क्याम सेन्टरहरू बन्द गर्ने वाचा गरेकी थिइन् । उनको सरकारले सीमावर्ती क्षेत्रमा बिजुली र इन्धनमा पहुँच रोकेको छ ।
