एजेन्सी, २१ पौष । इजरायलले फेरि गाजामा हवाई हमला गरेको छ ।
शनिबार राति गाजामा गरेको हवाई आक्रमणमा कम्तीमा २१ जनाको मृत्यु भएको छ । यस हवाई आक्रमणमा मारिनेमा कम्तीमा दुई बालबालिका पनि भएको बताइएको छ ।
अमेरिकी समाचार संस्था एपीमा छापिएको समाचारका अनुसार हमासले केही बन्धकहरूको भिडियो जारी गरेको थियो । त्यसपछि इजरायलमा ठुलो सङ्ख्यामा मानिसले र्याली निकाले । त्यसपछि इजरायलले यो हवाई हमला गरेको थियो । यो आक्रमणलाई भिडियोको प्रतिक्रियाका रूपमा हेरिएको छ ।
हमाससँग सम्बद्ध सिभिल डिफेन्सले जारी गरेको विज्ञप्तिमा हवाई हमलाले गाजा सहरको सराया कम्पाउण्ड पछाडिको आवासीय क्षेत्र ध्वस्त भएको छ । यस क्रममा कम्तीमा पाँच जनाको ज्यान गएको बताएको छ । यस बाहेक शनिबार साँझ इजरायली आक्रमणमा बुरेजमा तीन र मध्य गाजामा तीन जनाको मृत्यु भएको थियो ।
