एजेन्सी, १८ पौष । युरोपेली देश मोन्टेनेग्रोको दक्षिणमा गोलीकाण्डमा १० जनाको मृत्यु भएको छ ।
प्रहरीका अनुसार बुधबार भएको गोलीकाण्डमा मर्नेमा दुई बालबालिका पनि रहेका छन् । सरकारी टिभी च्यानल आरटीसीजीले पुलिस अधिकारीहरूलाई उद्धृत प्रशारण गरेको समाचार अनुसार घटना सेन्टिजेमा रहेको एउटा रेस्टुराँमा भएको थियो । अतिथिहरूसँग भनाभन पछि यो घटना भएको बताइएको छ ।
आक्रमणकारीले आफूलाई पनि गोली हानेको पछि पुष्टि भएको थियो । मोन्टेनेग्रो सरकारले बिहीबारदेखि तीन दिने राष्ट्रिय शोकको घोषणा गरेको छ । त्यहाँका प्रधानमन्त्री मिलोज्को स्पाजिकले गोलीबारीलाई ‘भयानक दुर्घटना’ भनेका छन् । आक्रमणकारीले आफ्नो परिवारका सदस्यलाई समेत मारेको बताइएको छ । यस क्रममा रेस्टुरेन्ट सञ्चालक र उनका दुई छोराछोरीको हत्या भएको गृहमन्त्री दानिलो सारानोभिकले बताएका छन् ।
