काठमाडौँ, ६ पौष । नेपाल प्रिमियर लिग (एनपीएल)को फाइनलमा जनकपुर बोल्ट्सविरुद्ध ब्याटिङ गरिरहेको सुदूरपश्चिम रोयल्सबाट ओपनर सैब जैबले अर्धशतक बनाएका छन् । सुदूरपश्चिम रोयल्सले पावर प्लेमा ४८ रन बनाएको छ ।
आज कीर्तिपुरस्थित त्रिवि क्रिकेट मैदानमा टस जितेर ब्याटिङमा आएको सुदूरपश्चिमबाट जैबले ३३ बलमा पाँच चौका र दुई छक्कासहित ५० रन पूरा गरे । प्रतियोगिताको उनको यो दोस्रो अर्धशतक हो ।
प्रतियोगिताको लिग चरणबाट शीर्ष दुईमा रहँदै प्लेअफ आइपुगेका टिम हुन्, जनकपुर र सुदूरपश्चिम । लिग चरणका सातमध्ये एक खेलमा मात्र हार व्यहोरेको सुदूरपश्चिमले १२ अंकसहित शीर्ष स्थान हाशिल गरेको थियो । दोस्रो स्थानमा रहँदै प्लेअफ आएको जनकपुरले समान खेल खेल्दा दुई हारसहित १० अंक जोडेको थियो ।
