काठमाडौँ, २३ असार । नेकपा (एमाले) का सांसद योगेश भट्टराईले राष्ट्रिय स्वतन्त्र पार्टी (रास्वपा) लाई लक्षित गर्दै प्रधानमन्त्री पुष्पकमल दाहाल ‘प्रचण्ड’ ले प्वाल पारिसकेको डुंगामा बसेर कता जाँदै हो भन्ने प्रश्न गरेका छन् ।
प्रतिनिधि सभाको आइतबारको बैठकमा बोल्दै भट्टराईले अल्पमतमा परिसकेको प्रधानमन्त्रीले केका लागि असार २८ गते विश्वास मत लिने भन्ने प्रश्न पनि गरे । प्रधानमन्त्री दाहाललाई प्रतिनिधि सभामा विश्वास मत घट्दो क्रममा रहेको पनि भट्टराईले बताए। भट्टराईले प्रधानमन्त्री दाहाललाई राजीनामा दिन पनि आग्रह गरेका छन् ।
‘म राष्ट्रिय स्वतन्त्र पार्टीलाई भन्न चाहन्छु, उहाँहरू उतै (सत्तापक्ष) मा बस्नुभएको छ । यो उहाँहरूको इच्छा हो, हामीलाई केही भन्नु छैन,’ भट्टराईले भने, ‘तर प्रधानमन्त्रीजीले प्वाल पारिसकेको डुंगामा बसिरहनु भएको छ भने तपाईंहरू कता जाँदै हुनुहुन्छ, सोच्नुहोला ।’
