लण्डन, ५ जेठ । बार्सिलोनाले १३ वर्षीय लियोनेल मेस्सीलाई अनुबन्ध गर्नका लागि एउटा न्यापकिनमा गरेको करार लिलामीमा ७ लाख ६२ हजार ४०० पाउन्ड (करिब १३ करोड रुपैयाँ) मा बिक्री भएको छ ।
१६.५ बाई १६.५ सेन्टिमिटरको फ्रेममा लेमिनेसन गरेर राखिएको उक्त न्यापकिनको सुरुवाती मूल्य ३ लाख पाउन्ड रहेको थियो । निलो मसीले सन् २००० को डिसेम्बरमा हस्ताक्षर गरिएको न्यापकिनमा बार्साका तत्कालीन निर्देशक कार्लेस रेस्याचले मेस्सीलाई अनुबन्ध गर्ने प्रतिबद्धता जनाएका छन् ।
उक्त करारमा ट्रान्सफर एडभाइजर जोसेप मिनगुएला र एर्जेन्टिनी युवा खेलाडीलाई सिफारिस गर्ने एजेन्ट होरासियो गागिवलीले पनि हस्ताक्षर गरेका छन् ।
