काठमाडौँ, १९ फागुन । दोस्रो संस्करणको केपी ओली फुटबल कपको उपाधि मच्छिन्द्र फुटबल क्लबले जितेको छ ।
आज काठमाडौँको दशरथ रंगशालामा राष्ट्रिय युवा संघ नेपालको आयोजनामा गरेको प्रतियोगिताको फाइनलमा न्युरोड टिम (एनआराटी)लाई टाइब्रेकरमा पराजित गर्दै मच्छिन्द्रले लगातार दोस्रोपटक उपाधि चुमेको हो ।
निर्धारित ९० मिनेटको खेल गोलरहित बराबरीमा पुगेपछि विजेताको टुंगो टाइब्रेकरबाट लगाइएको थियो । टाइब्रेकरमा मच्छिन्द्रले ५–४ ले नतिजा आफ्नो पक्षमा पार्यो । विवेक गुरुङको पेनाल्टी गोलपोस्टभन्दा परबाट बाहिरिएपछि एनआरटी उपविजेतामा चित्त बुझाउन बाध्य भयो । मच्छिन्द्रका सनिश श्रेष्ठ, दिवाकर चौधरी, स्टेफन विनोङ, क्रिस्टोफर चिजोबा र देवेन्द्र तामाङले गोल गरे । एनआरटीका सरोज तामाङ, सञ्जीव विष्ट, अभिषेक लिम्बू र मोहित गुरुङले गोल गरेका थिए ।
उपाधि विजेता मच्छिन्द्रले ११ लाख रुपैयाँ र ट्रफी प्राप्त गर्यो । उपविजेता एनआरटीले पाँच लाख रुपैयाँ प्राप्त गर्यो ।
