काठमाडौँ, ६ फागुन । नवनित धलिवाल र निखिल दत्तको अर्धशतकप्रेरित क्यानडा–११ ले तीन खेलको एकदिवसीय शृंखला अन्तर्गत पहिलो खेलमा नेपाल ‘ए’लाई चार विकेटले हराएको छ ।
आइतबार मूलपानीस्थित क्रिकेट मैदानमा नेपाल ‘ए’ले दिएको २१७ रनको लक्ष्य क्यानडा–११ ले ४९.३ ओभरमा ६ विकेट गुमाएर भेटायो । क्यानडाको जितमा नवनितले सर्वाधिक ८० रन बनाए । उनले ७६ बलमा १२ चौका र दुई छक्का प्रहार गरे । ४५–४ को नाजुक अवस्थाबाट नवनितले निखिलसँग ७५ रनको साझेदारी गर्दै क्यानडाको इनिङ सम्हालेका थिए ।
अन्तिमसम्म अविजित रहेका निखिलले ११५ बलमा पाँच चौका र एक छक्कासहित ६७ रन बनाए । कप्तान साद जफरले २२ र श्रेयान्स मोभ्वाले २२ रन थपे । नेपालका साहब आलमले दुई विकेट लिए । प्रतिश जीसी, राशिद खान, सागर ढकाल र बसिर अहमेदले समान एक विकेट लिए ।
