काठमाडौँ, ५ मंसिर । यमन विरूद्धको खेल हेर्न दशरथ रंगशाला आउने दर्शकलाई अखिल नेपाल फुटबल संघ (एन्फा)ले निः शुल्क बस सेवा उपलब्ध गराउने भएको छ।
फिफा विश्वकप एसिया छनोटअन्तर्गतको दोस्रो चरणको खेलमा नेपाल आज यमनसँग भिड्दै छ । खेल बेलुका ७ बजेदेखि सुरू हुनेछ।
खेल सक्किएपछि दर्शकरहरूलाई घर जान सहज होस् भन्नका लागि एन्फाले निःशुल्क बस उपलब्ध गराउन लागेको हो। त्यसका लागि १५ वटा बसको व्यवस्था गरिएको एन्फाले जनाएको छ ।
ती बसहरू काठमाडौँका विभिन्न रूटमा चल्नेछन् । एन्फाले उपलब्ध गराउने बसमा चढेर घर जान दर्शकहरूले टिकट देखाउनुपर्नेछ । आज हुने खेलको टिकट सामान्य ४ सय र भीआइपीतर्फ १ हजार रूपैयाँ निर्धारण गरिएको छ । टिकट आज बिहान ८ बजेदेखि साँझ ५ बजेसम्म दशरथ रंगशालामा उपलब्ध हुनेछ ।
