काठमाडौँ, २१ असोज । फिल्म ‘महाजात्रा’ले घोषणादेखि नै विदेश प्रदर्शन अधिकार बिक्री हुँदै आएको छ ।
निर्माताले गत महिना फिल्मको औपचारिक घोषणा गरेदेखि नै ‘महाजात्रा’ को अन्तर्राष्ट्रिय बिक्री हुन थालेको हो । निर्माताद्वय म्याक्स दीपेश खत्री र रविन्द्रसिंह बानियाँले फिल्मको नयाँ पोस्टर सार्वजनिक गर्दै अन्तर्राष्ट्रिय अधिकार ‘सोल्डआउट’ भएको जनाएको छ ।
पोष्टरमा विपिन कार्की, रविन्द्रसिंह र रविन्द्र झा देखिएका छन् । अष्ट्रेलियामा रहेको एमएसएम इन्टरटेनमेन्टले फिल्मको भारतबाहेक अन्य अन्तर्राष्ट्रिय बजारको राइट खरिद गरेको हो ।
निर्देशक प्रदीप भट्टराईले जीवन समृद्ध तुल्याउने सपना र त्यसको व्यवस्थापन गर्दा आइपर्ने समस्यालाई फिल्ममा रोचक रुपले प्रस्तुत गरिने बताए । ‘महाजात्रा’ लाई म्याक्स दीपेश खत्री र यज्ञश्वर पौडेलले निर्माण गर्नेछन् । प्रोडक्सन म्यानेजरमा रूपक प्रताप अधिकारी छन् । दशैंलगत्तै फिल्म छायांकन सुरु हुनेछ ।
