काठमाडौँ, २० बैशाख । साउदी अरबको अल–नासरसँग महंगो रकममा अनुबन्धित भएका क्रिस्टियानो रोनाल्डो विश्वको सबैभन्दा धेरै कमाउने खेलाडी बनेका छन् ।
फोर्बसका अनुसार २०२३ मा सबैभन्दा धेरै कमाउने खेलाडीको सुचीमा पेरिस सेन्ट जर्मेन (पीएसजी)का लियोनल मेसी दोस्रो र काइलियन एमबाप्पे तेस्रो स्थानमा छन् । रोनाल्डो गत वर्ष म्यानचेस्टर युनाइटेड छाडेर सन् २०२५ सम्मको सम्झौतामा साउदी फुटबल क्लबमा अनुबन्ध भएका थिए । पोचुगलका ३८ वर्षे रोनाल्डोले खेलेर झण्डै वार्षिक चार करोड ६० लाख अमेरिकी डलर कमाउने फोर्बसले जनाएको छ ।
फोर्बसका अनुसार उनको मैदान बाहिरको कमाइ ९ करोड रहेको छ । रोनाल्डोको जम्मा कमाइ १३ करोड ६० लाख रहेको छ । दोस्रो स्थानमा रहन सफल अर्जेन्टिनाका कप्तान लियोनल मेसीको कमाइ १३ करोड छ । मेसीले मैदानभित्रबाट ६ करोड ५० लाख र मैदान बाहिरबाट ६ करोड ५० लाख कमाउँछन् ।
